Home / کالم / بڑا پاکستان اور چھوٹے پاکستان

بڑا پاکستان اور چھوٹے پاکستان

 


بڑا پاکستان اور چھوٹے پاکستان
صاحبزادہ محمد امانت رسول
ہر شخص اپنے معاشرہ ،ملک اورماحو ل کو ترک کرسکتاہے لیکن اپنے روایتی اورسیاسی کلچر کو ایک دن میں نہےں چھوڑ سکتا ،اگر وہ تنقیدی انداز ِفکر سے بالکل محروم ہے اورتعلیم کی دولت سے بھی ، تو پھر اس کے امکانات اوربھی کم ہوجاتے ہےں ۔وہ شخص جس نے اپنے ملک کی معاشرت ، معیشت اورسیاست کے ماحول میں کئی سال گزارے اور پختہ ذھنیت کے ساتھ کسی اور ملک میں جا بسا ، اب اس کے رجحانات اوررویے ظاہر کریںگے کہ اس نے اپنے ملک سے کیا تعلیم وتربیت پائی ہے ،اس طرح ہر شخص اپنے ملک کا نمائندہ اورسفیر ہے ۔کوئی قوم بھی اس وقت تک ترقی نہےں کرسکتی جب تک اسے اپنے آپ پر تنقید کی عادت نہ ہو ۔اسلامی تعلیمات کا پہلا سبق بھی یہی ہے ،خود تنقیدی احساس ِندامت پیدا کرتی ہے اور احساسِ ندامت سے ہی” توبہ“نصیب ہوتی ہے ۔
1947ءسے لے کر اب تک ہمیں سیاسی زوال ،معاشرتی انتشار اورمذہبی طرز فکر کا تحلیلی اورتنقیدی جائزہ لینا چاہیے، جس نے فقط پاکستان میںہی نہےں بلکہ بیرون ملک رہنے والے پاکستانیوں کے انداز زندگی کو بھی متاثر کیا ہے ۔
میرے ایک عزیز دوست کا کہنا ہے کہ یورپ میں جہاں جہاں پاکستانی رہ رہے ہےں وہاں وہاں ایک منی پاکستان (Mini Pakistan)ہے ۔چھوٹے پاکستان کو وسیع کرتے جائیں ،وہ بڑا پاکستان بن جائے گا۔جو کچھ چھوٹے پاکستان میںہورہا ہے ،وہی کچھ بڑے پاکستان میں بھی ہورہا ہے ۔ اگر یہاں سیاسی جماعتیں ہےں وہاں بھی سیاسی جماعتیں ہےں ،اگر یہاں فرقہ واریت ہے تو وہاں بھی فرقہ واریت ہے ،اگر یہاں کم ذات اور اعلی ذات کے لوگ ہےں تو وہاں بھی کم ذات اوراعلی ذات کے لوگ ہےں، اگر یہاں جہالت ہے تو وہاں بھی جہالت ہے، اگر یہاں لوگوں میں مطالعہ کا شوق نہےں، تو وہاں بھی مطالعہ کاشوق رکھنے والے کم ہےں، اگر یہاںتعویز گنڈے چلتے ہےں، تو وہاں بھی چلتے ہےں اگر لیڈر یہاں ہےں تو لیڈری چمکانے والے وہاں بھی ہےں، اگر یہاں قوم تقسیم ہے تو وہاں بھی تقسیم ہے، اگر یہاں میڈیا کردار کشی کے لئے استعمال ہوتاہے تو وہاں بھی ایک دوسرے کی کردار کشی کے لئے میڈیااستعمال کیا جاتاہے، اگر یہاں رمضان المبارک اورعیدین کے چاند کی روئیت پر اختلاف ہے تو وہاں بھی پاکستانی اختلاف کا شکارہےں ، اگریہاں اہم ملکی معاملات پر قوم متفق نہےں تو وہاں بھی اتفاق واتحاد دور دور تک نظر نہےں آتا، اگر یہاں لوگوں میں برداشت نہےں تو وہاں بھی برداشت کی کمی نظر آتی ہے، اگر یہاں مذہبی طبقہ جدید تعلیم سے محروم نظر آتاہے وہاں بھی مذہبی طبقہ اسی حالت میں قوم کی راہنمائی کررہاہے۔
تخلیق پاکستان سے لے کر اب تک بیرون ممالک میں سکونت پذیر ہونے والے پاکستانیوں کی اکثریت غریب خاندانوںسے تعلق رکھتی تھیں جنہیں تعلیم ،صحت اورروز گار جیسی بنیادی ضروریات بھی میسر نہےں تھیں۔پاکستان کی معاشی اورسیاسی صورتِ حال نے لوگوں کو بیرون ممالک جانے اور جانے والوں کو وہاں قیام کرنے پر مجبور کیا تارکین وطن نے یورپ ،امریکہ اورکینیڈا کے علاوہ دوسرے ممالک میں دن رات مزدوری کی، وقت گزرنے کے ساتھ ساتھ وہ معاشی حوالے سے مضبوط ہوتے چلے گئے ۔کسی نے کاروبار کیا اورکسی نے فیکڑی میں کام کیا ،کوئی ٹیکسی چلاتا رہا او ر کوئی شراب بیچتارہا، کسی نے حکومت سے فراڈ کیا اور کسی نے ایمانداری اور شرافت کاسبق یاد رکھا، الغرض ہر پاکستانی نے اپنی عقل یا نقل سے دولت کمائی ۔لیکن ایک کمی رہ گئی اوروہ کمی تعلیم کی ہے پہلی نسل میں تعلیم کی کمی اس لئے رہ گئی کہ وہ تعلیم کے لئے یورپ یا کسی اورملک میں نہےں گئی تھی ۔اس کا مقصد اپنی اور اپنے خاندان کی غربت کو ختم کرنا تھا اور اس نے غربت ختم کردی ۔ادھر وہ محنت مزدوری کرتے رہے اورادھر پاکستان میںمعاشی ،معاشرتی ،مذہبی اورسیاسی سفر جاری رہا ۔پہلے ان ملکوں کی کرنسی پاکستانی کرنسی سے کمزور تھی، اب پاکستانی کرنسی ان کی کرنسی سے بہت نیچے ہے ۔پہلے ملکی اداروں کا کسی حد تک وقار تھا ، جو اب کہیں نظر نہےں آتا ۔اس وقت اسمبلیاں ایک بار بھی نہےں ٹوٹی تھیں اور اب کئی بار ٹو ٹ چکی ہےں ۔پہلے دہشت گردی کا کوئی وجود نہےں تھا ،اب آئے دن غریب عوام دہشت گردی کا نشانہ بنتے ہےں ۔پہلے امام بارگاہوں اورمساجد میں بم نہےں پھٹتے تھے ، اب بموں کا پھٹنا معمول بن چکاہے ۔
30,25سال قبل پاکستان چھوڑ کر جانے والے لوگوں نے یورپ میں دو کام خوب کئے ہےں ۔ پہلاکام مساجد کی تعمیر اوردوسراکام سیاسی جماعتوں کی تشکیل … . . . چونکہ تعلیم کی کمی کے باعث وہ اس معاشرے میں کوئی مﺅثر کردار اداکرنے سے قاصر تھے ،لہذا انہوں نے ان دوکاموں میںبڑھ چڑھ کر حصہ لیا،پاکستان اورپاکستانی کمیونٹی کی خوب خدمت کی ۔جب مساجد وجود میں آئیں توان کی انتظامیہ بنی اور پھر اس انتظامیہ میں صدر ،نائب صدر اورجنرل سیکرٹری منتحب ہوئے ۔ان کے انتخاب کے بعد اپوزیشن وجود میں آگئی اورجوڑ توڑ کا سلسلہ شروع ہوگیا ۔مسجد انتظامیہ کے اجلاس کا ماحول قومی اسمبلی کے ماحول سے قطعاجدا نہےں ہوتا ،جیسے یہاں ڈیسک بجائے جاتے ہےں ویسے وہاں بھی کسی کی بات نہےں سنی جاتی ،جیسے یہاں نازیبا الفاظ استعمال کئے جاتے ہےں ، وہاں بھی نازیبا گفتگو کی جاتی ہے ،جیسے یہاں اسمبلی توڑ دی جاتی ہے ،ویسے ہی وہاں انتظامیہ توڑ دی جاتی ہے جیسے یہاں معاملہ حد سے بڑھے تو مارشل لاءلگادیا جاتاہے ،ویسے وہاں مسجد کو تالا لگا دیا جاتا ہے ۔
سب سے زیادہ دکھ اس بات کا ہے کہ جس فرقہ وارانہ سوچ نے پاکستان کی بنیادوں کو دیمک کی طرح چاٹ کھایا ہے ،ہم اسی سوچ کو وہاں پھیلانے میں لگے ہوئے ہےں ۔پاکستان سے جانے والاامام ،خطیب اورعالم اس ملک کی زبان سے ناواقف ہوتاہے ۔اس معاشرے کے جدید رجحانات سے لاعلم ہوتاہے ۔سائنسی تعلیم ،معاشی اورسیاسی حوالے سے ترقی یافتہ معاشرے میں اس عالم کا انداز فکر بالکل دقیانوسی اور قدامت پسند انہ ہوتاہے ۔کجا یہ کہ وہ کسی غیر مسلم کو متاثر کرے ، اس کا اندازِ گفتگو اور طرزِ فکرمسلم نوجوانوں کی فکری تسکین کا باعث بھی نہےں بنتی۔یورپ میںرہنے
والے ایک سادہ لوح ،لیکن باشعور پاکستانی کا کہنا ہے :”میں نے 11ستمبر 2001ءکے بعد سی این این ،بی بی سی اوردوسرے یورپین چینلز دیکھنا شروع کئے ہےں ،میں اس نتیجے پر پہنچاہوں کہ ہمیںترقی یافتہ قوم بننے کے لئے جس سمت سفر کرناچاہیے ،ہم اس طرف سفر نہےں کررہے ۔ ہماراکوئی کام بھی ایسانہےں ،جس کے باعث ہم مستقبل میں امریکہ اوریورپ کے مقابل کھڑے ہوسکیں “۔یہ ایک ایسی حقیقت ہے ،جسے آج شائد ہم ماننے کے لئے تیار نہ ہوں ،لیکن کل بہر صورت ہمیںیہ حقیقت تسلیم کرنا ہوگی ۔
مساجد کی انتظامیہ کی طرح سیاسی جماعتیں بھی انتشار وافتراق کا شکار رہتی ہےں ،بلکہ اس سے بھی زیادہ خراب صورت حال ہے ۔کئی ممالک میں ایک ہی سیاسی جماعت کے ماتحت دودو گروپ کام کررہے ہےں ۔ان میں سے ہر ایک کادعوی ہے کہ اسے اپنے لیڈر کی حمایت حاصل ہے ،اگر دونوں گروپ کسی ایک جگہ اکٹھے ہو جائیں ،وہاں ہاتھا پائی کی نوبت آجاتی ہے ۔اکثر پاکستان ڈے پر سفارت خانہ میں منعقد ہ تقریب بدمزگی کا شکار ہوجاتی ہے ،اگر سفیر پاکستان دونوں دھڑوں میںسے کسی کی حمایت یا مخالفت نہ کریںتو دونوں ان کے مخالف ہوکر عدم اعتماد کی وہ تحریک چلاتے ہےں کہ بس رہے اللہ کانام ….. ہفت روزہ ،پندرہ روزہ اورماہوار اخبار وجرائد میں سفیر پاکستان کا خاندانی پس منظر ،عقیدہ ، نظریات اورقابلیت کو تنقید کا نشانہ بناکر لوگوں کو گفتگو او ر بحث کے لئے ایک ایشودے کر حکومت پاکستان کو تاثر دیاجاتاہے کہ ان کی غیر جانبداری مشکوک ہوچکی ہے وہ اپنے فرائض ادا کرنے کے اہل نہےں رہے ،لہذا انہےں واپس بلالیا جائے ۔اس طرح یہ گروپ اپنے نفس کی تسکین کا اہتمام کرتے ہےں ۔
یورپ میں ایک بات خاص طورپر دیکھنے میں آتی ہے اوروہ عہدے اورمنصب کی خواہش ہے اوراس کے حصول کے بعد فخر وافتخار کا احساس ۔ یہ خواہش اور احساس یکدم کسی شخص کے دل میں پیدا نہےں ہوتا ۔یہ بھی معاشرے کے کرتا دھرتا افراد کے کردار کا ہی عکس ہوتاہے ، جوعام شخص کی خواہش اورتمنا بن جاتاہے ۔ہم شروع سے دیکھتے آئے ہےں کہ پاکستانی معاشرے میں دولت مند اورمنصب دار کی ہرکوئی عزت کرتاہے ان دوکی بڑی اہمیت ہے ،ایسے شخص کی عزت کوئی نہ بھی کرے تووہ زبردستی عزت کروا لیتاہے ۔بس یہی جھلک ہمیں بیرونی ممالک میںسیاسی جماعتوں کے عہدیداروں میںبھی نظر آتی ہے ،اگر آپ کسی سیاسی جماعت کے عہدیدارسے نام پوچھیں تو وہ نام بعدمیں اورعہدہ پہلے بتائے گا،اپنے اپنے گھر وں میں فون کرکے ،رشتہ داروں کو بتائیں گے کہ میں فلاں سیاسی جماعت کا صدر بن گیا ہوں ،بلکہ بعض مواقع پر بڑی بڑی دعوتیں بھی دیکھنے میں آتی ہےں ،جیسے پاکستان میں الیکشن کے بعد جیتنے والاامیدوار دعوتوں کا اہتمام کرتاہے ۔
بعض دانشور حضرات کا کہنا ہے کہ بیرون ممالک میں پاکستان کی سیاسی جماعتوں کا وجود ختم کر دیا جائے تاکہ اوورسیز پاکستانی مل جل کر پاکستان کی خدمت کریں۔میرے نزدیک بیرونی ممالک میں پاکستانیوں کے درمیان انتشار وافتراق کے خاتمے کا یہ علاج مستقل اوردیر پا نہےں ،کیونکہ انتشار کسی نہ کسی شکل میںپھر بھی موجود رہے گا ۔جماعتیںنہ رہےں گی،لیکن وابستگیاں قائم رہےں گی ،سیاسی جماعتیں نہ ہوں گی تو مذہبی جماعتیں ان کی کمی پوری کردیں گی مذہبی جماعتیں نہ ہوں گی تو ذات پات کی دیواریں پاکستانیت کی راہ میں کھڑی ہوجائیں گی ،بہر حال انتشار باقی رہے گا۔میرے نزدیک مستقل علاج یہ ہے کہ بڑے پاکستان کو بدلا جائے ،اس کے سیاسی کلچر کو بدلاجائے ،اس میںپروان چڑھنے والے منفی رویوں کو بدلاجائے اوراس تبدیلی کے لئے دو کام کئے جائیں ، حکومت تعلیم عام کرے اوردانشوران ِقوم شعور وآگہی عام کریں۔ یقین کیجئے جس دن بڑا پاکستان بدل گیا ،اسی دن چھوٹے پاکستان (Mini Pakistan)بھی بدل جائےں گے ۔

Check Also

انڈی میوزک کے لیے جاپان میں بننے والا سپورٹ پلیٹ فارم الفانوٹ بھارت میں جاری

انڈی میوزک کے لیے جاپان میں بننے والا سپورٹ پلیٹ فارم الفانوٹ بھارت میں جاری ...

Leave a Reply

Your email address will not be published. Required fields are marked *