Home / کالم / سپاہی مقبول حسین -پاکستان زندہ باد”

سپاہی مقبول حسین -پاکستان زندہ باد”

سپاہی مقبول حسین -پاکستان زندہ باد”
(زاہد یعقوب عامر)
یہ ستمبر 2005 ہے. بھارتی حکومت کی طرف واہگہ بارڈر کے راستے پاکستانی سول قیدیوں کا ایک گروپ پاکستانی حکام کے حوالے کیا گیا.وہی انداز جو ہمیں اکثر میڈیا پر دیکھنے کو ملتا ہے. مچھیرے.. غلطی سے بارڈر پار کر جانے والے.. کچھ سمگلر..دونوں طرف سے کیمرے میں محفوظ کئے جانے والے مناظر اور دنیا کو دکھانے کے لیے امن کے پیغام. ایسے میں خالی ہاتھوں,  الجھے بالوں,  ناتواں جسم اور عجیب و غریب سے حلیےوالا ایک قیدی بھی ان کے ہمراہ ہے.. جذبات سے عاری چہرہ.. پوچھنے پر کچھ نہ بتا پایا.. اشارے سے زباں کی طرف اشارہ کرتا ہے.. کٹی زباں سب اہلکاروں کو نظر آتی ہے۔زباں کی طرف دیکھنے والے اہلکاروں کے احساسات دیکھ کر اس قیدی کے چہرے پر بھی ایک مسکراہٹ ابھرتی ہے.  آنکھوں میں عجیب سی چمک نظر آتی ہے .
 ضروری کاروائی مکمل کی جاتی ہے.تمام قیدیوں کو فارغ کر دیا گیا ۔وہ اپنی اپنی منزل کو بڑھتے ہیں. اس قیدی سے ضروری پوچھ گچھ کی جاتی ہے۔ وہ کچھ نہ بتا پایا۔ حکام اس شخص کے بارے فیصلہ کرنے سے قاصر تھے. اس صورتحال کے پیش نظر انہیں بلقیس ایدھی سنٹر بھجوا دیا گیا.. اخبارات میں اشتہارات  دیے گئے.. مقبول حسین کی ایک بہن حیات تھیں جنکا ایک بیٹا آرمی سے ریٹائرڈ تھا.  اسے خبر ملی کہ بھارت کی طرف سے آنے والے قیدیوں میں اپنے ماموں کو تلاش کر سکتے ہو.. بشارت حسین نے تمام عمر اپنی ماں سے مقبول حسین کے بارے ہی سنا تھا.. وہ اسکا سچا ہیرو تھا. انہوں نے کبھی یقین نہیں کیا تھا کہ مقبول حسین اس دنیا میں نہیں ہے.. بشارت ایدھی سنٹر پہنچا اور اس نے مقبول حسین کو دیکھا.اس کی تصویر اپنی والدہ کو دکھائ اور اسے مختلف علامات اور نشانات سے پہچان لیا گیا.. سپاہی مقبول کے عزیز محمد شریف 27 ستمبر 2005 کو انہیں بلقیس ایدھی ہوم سے ان کے آبائی گاﺅں ناریاں‘ تراڑ کھل‘ ضلع سندھنوتی آزادکشمیر لے گئے۔  . ے اور پھر ایک انکشاف تمام پاکستان کے لئے  کسی معجزے سے کم نہیں تھا.. یہ نیم پاگل نظر آنے والا شخص سپاہی مقبول حسین تھا.  کشمیر میں ہونے والے آپریشن  کاسپاہی جو دشمن کی قید میں زندگی ہے چالیس برس گزار کر اپنی دھرتی ماں پر واپس پہنچا تھا.  اس دعوے کے پیش نظر مقبول حسین کو کشمیر رجمنٹل سنٹر  لایا گیا. کمانڈنٹ کے سامنے پیش کیا گیا۔ اس نے ایک نوجوان فوجی کی طرح کمانڈر کو سلیوٹ کیا۔ اور ایک کاغذ پر یہ نمبر لکھا..
“330139 “
 کمانڈنٹ کو کٹی زباں والے شخص کے بارےاتنا ہی تجسس تھا جس کا اظہار دوسرے لوگ کر رہے تھے. کمانڈنٹ کے حکم پر قیدی کے لکھے نمبر کی مدد سے جب ایک پرانی فائل کھولی گئ تو یہ واقعی سپاہی مقبول حسین تھا. وہ مقبول جس کو جنگ کے دوران نہ ملنے کے سبب ایک مخصوص وقت کے بعد شہید قرار دے دیا گیا تھا.  وہ اپنے ساتھیوں کے ہمراہ دشمن کے علاقے میں اسلحہ کے ایک ڈپو کو تباہ کر کے واپس آ رہا تھا کہ اسی دوران اس کی دشمن سے جھڑپ ہو گئی۔ سپاہی مقبول حسین جو اپنی پشت پر وائرلیس سیٹ اٹھائے ہوئے تھا۔ اپنے افسران سے پیغام رسائی کے فرائض کے ساتھ ساتھ ہاتھ میں اٹھائی مشین گن سے دشمن کا مقابلہ بھی کر رہا تھا اور اسی دوران وہ مقابلے میں زخمی ہو گیا ۔ سپاہی اسے اٹھا کر واپس لانے لگے  مگر ساتھیوں کی حفاظت اور مشکل کا سوچ کر مقبول حسین نے خود کو ایک کھائ میں گرا لیا. ساتھی اسے تلاش کرتے رہے جبکہ وہ آنے والے دشمن کو روکنے کی منصوبہ بندی کر رہا تھا..ساتھی جب  اسے نہ ڈھونڈ سکے تو آگے بڑھ گئے.. اور پھر مقبول حسین نے اپنی مشین گن سے دشمن کو مسلسل الجھائے رکھا.. اسی دوران اسے مزید گولیاں لگیں. اور وہ دشمن کے ہاتھوں جنگی قیدی بن گیا. جب جنگ ختم ہی تو دونو ملکوں کے درمیان قیدیوں کی فہرستوں کا تبادلہ ہوا اس دوران بھارت نے کہیں بھی سپاہی مقبول حسین کا ذکر نہ کیا ۔ اس لیے پاک فوج نے بھی سپاہی مقبول حسین کو شہید تصور کر لیا .  یادگار شہداء پر بھی اس کا نام کندہ کر دیا گیا۔ بھارتی افواج نے مقبول حسین پر ظلم وستم کے پہاڑ توڑے.. اسے چار فٹ کی کوٹھری میں بند کرکے تشدد اور اذیت سے دوچار کیا گیا۔پاؤں سے ناخن اورمنہ سے دانت اکھاڑ دئیے گئے. اس کی زباں پر ایک ہی نعرہ ہوتا.. پاکستان زندہ باد.. وہ اسے مجبور کرتے کہ پاکستان کو گالی دو.. مگر اس کی زباں پر صرف اپنے وطن عزیز کا نعرہ ہوتا..
بھارتی فوجی اس پر ٹوٹ پڑتے اور تشدد کا نشانہ بناتے. یہ ان کے لئے برداشت اور حب الوطنی کا ٹسٹ کیس تھا. وہ اسے جنگی قیدی کا سٹیٹس بھی اس لئے نہ دے رہے تھے کہ مقبول حسین انکے لئے ایک ضد تھا.. چیلنج تھا جبکہ مقبول کے لہو میں تو صرف اس وطن کی محبت تھی.. ۔
 سپاہی مقبول حسین ڈٹا رہا. اس کی ہمت کے سامنے بھارتی سپاہ کچھ بھی نہ کر پا رہی تھی.. وہ تو بس ایک نعرہ لگاتا اور جیل کے دیوار گونج اٹھتے..پاکستان زندہ باد. ۔ آخر انھوں نے اس کی زبان سے بدلہ لینے کا سفاکانہ فیصلہ کر لیا. انہوں نے سپاہی مقبول حسین کی زبان کاٹ دی. اب وہ پاکستان زندہ باد کا نعرہ نہیں لگا سکتا تھا.. ہاں مگر وہ لکھ سکتا تھا.. وہ جیل کی چار فٹ چوڑی دیوار پر لکھتا رہا.. پاکستان زندہ باد.. اور 355139.. وہ آرمی نمبر جسے وہ کبھی بھولنا نہیں چاہتا تھا.. وہ بھولنا تو اپنی اس منگیتر نصیراں  کو بھی نہیں تھا جو مقبول حسین کی منتظر تھی.اپنی بہن سرور جان جو اسکی لاڈلی تھی. وہ اس ماں کو بھی نہیں بھولنا چاہتا تھا جس نے مقبول کی شہادت کا خط ملنے کے بعد کہا تھا کہ میرا مقبول زندہ ہے.. وہ ایک دن ضرور واپس آئے گا. اور پھر وہ تمام عمر اسکا گاؤں کے داخلی حصے میں رہتے ہوئے  انتظار کرتی رہی…وہ کہتی تھی کہ مجھے گاؤں کے شروع میں دفن کیا جائے.. میں اپنے مقبول کا استقبال کروں گی…سپاہی مقبول حسین نے 1965 سے لے کر 2005 تک اپنی زندگی کے بہترین  40سال اس اندھیری کوٹھری میں گزار دئیے۔ کٹی زبان سے پاکستان زندہ آباد کا نعرہ تو نہیں لگا سکتا تھا لیکن اپنے جسم سے بہتے خون کی مدد سے پاکستان زندہ باد لکھ دیتا۔ یوں سپاہی مقبول حسین نے اپنی زندگی کے چالیس سال اس وطن پر وار دیے.. نہ جھکا.. نہ ڈرا.. ہاں رویا ضرور ہوگا.. فوجی تھا مگر تھا تو ایک گوشت پوست کا ٹکڑا. اسکا دل بھی اپنے وطن اور ماں کی محبت میں رویا ہوگا.. اسکے گال بھی بھیگے ہونگے.. نہ کسی اعزاز کا لالچ نہ کسی مرتبے کی فکر.. اس فوج کا سب سے جونئر اہلکار اور اس فوج کے سب سے بڑے عہدے دار سے بھی زیادہ معتبر اور قابل قدر. مٹی کو محبت اور آغوش اسے واپس کھینچ لائ.. ایک زندہ لاشے کی مانند…
آج اگست کی 28 تاریخ 2018.. پاکستان کی فضا ضرور روئ ہوگی.. مقبول حسین اپنی آنکھیں ہمیشہ کے لئے موند کر اس مٹی میں دفن ہوا چاہتا ہے..اب وہ بظاہر ہم میں نہیں مگر ہم سب میں ہے.. ہمیشہ رہے گا.. وہ اس مٹی کا سچا بیٹا تھا.. اس نے وردی کو گالی دینے والے اپنوں کے لئے زندگی کے چالیس سال دشمن کے ظلم سہے. اس نے کسی تنخواہ اور عہدے کے لیے اپنی زندگی نہیں گزار بلکہ اس دھرتی ماں کے وقار اور تقدس کے لئے.. جب تک یہ دنیا ہے.. دنیا کی افواج ہیں سپاہی مقبول جیسے بیٹوں کی بدولت ہی اپنی سرزمین کی سچی محافظ ہیں.. اس محافظ وطن کو ستارہ جرآت کے اعزاز سے نوازا گیا.. آزاد کشمیر رجمنٹل سنٹر میں انہیں نہائیت عزت و احترام سے ٹھہرایا گیا.. انکے علاج اور آرام کے لئے ہر سطح پر ہر کوشش کی گئ.انکو ہر سہولت فراہم کی گئ. وہ ہم سب کا مان اور سچے ہیرو تھے.. اسی لئے آج جب انکی وفات کا پیغام موصول ہوا تو انکے لواحقین میں آزاد کشمیر رجمنٹ کا نام سر فہرست تھا..
28 اگست 2018 شام سات بج کر پندرہ منٹ..مقبول حسین دار فانی سے رخصت ہوئے… پاکستان کے اس بہادر بیٹے کے لئے سلام عقیدت
(زاہد یعقوب عامر )
سکوارڈن لیڈر
PAF BASE NUR KHAN ,BHQs
RAWALPINDI

Check Also

عشقِ حسین ؓمیری زندگی

حسینؓنے وعدہ وفا کردیا حسینؓ سب کا حسینؓرب کا علی جان (لاہور) وہ جس نے ...

Leave a Reply

Your email address will not be published. Required fields are marked *