Home / خبر یں / نگراں وزیراعظم کا معاملہ پارلیمانی کمیٹی کے پاس جائے گا، خورشید شاہ

نگراں وزیراعظم کا معاملہ پارلیمانی کمیٹی کے پاس جائے گا، خورشید شاہ

 

اسلام آباد: قومی اسمبلی میں قائد حزب اختلاف خورشید شاہ نے کہا لگتا ہے کہ نگراں وزیراعظم کا معاملہ پارلیمانی کمیٹی کے پاس جائے گا۔اسلام آباد میں خورشید شاہ کی زیر صدارت پبلک اکاؤنٹس کمیٹی (پی اے سی) کا اجلاس ہوا۔ اس موقع پر اپوزیشن لیڈر نے نگراں وزیراعظم کے تقرر کے حوالے سے گفتگو کرتے ہوئے حکومتی رویے پر مایوسی کا اظہار کیا۔ اپوزیشن لیڈر نے نگراں وزیراعظم کا معاملہ پارلیمانی کمیٹی میں جانے کا عندیہ دے دیا۔خورشید شاہ نے کہا لگتا ہے نگراں وزیراعظم کا معاملہ پارلیمانی کمیٹی کے پاس جائیگا، حکومت معاملے پر اپنی بات سے پیچھے ہٹ رہی ہے، وزیراعظم کو ہمارے نام مسترد کرنے کا کوئی اختیار نہیں، اپوزیشن کے نام مسترد نہیں ہو سکتے بلکہ پارلیمانی کمیٹی کو بھیجے جائیں گے۔وزیراعظم شاہدخاقان عباسی اور اپوزیشن لیڈر خورشیدشاہ کے درمیان نگراں وزیر اعظم کے معاملے پر گزشتہ روز پانچویں ملاقات ہوئی تاہم کسی نام پر اتفاق رائے نہ ہوسکا۔ پیپلزپارٹی کی جانب سے نگراں وزیراعظم کے لیے سابق چیئرمین پی سی بی ذکا اشرف اور سابق سیکریٹری خارجہ جلیل عباس جیلانی کے نام تجویز کیے گئے ہیں جب کہ تحریک انصاف کی جانب سے سابق چیف جسٹس تصدق حسین جیلانی، عبدالرزاق داؤد اور سابق گورنر اسٹیٹ بینک ڈاکٹر عشرت حسین کے نام تجویز کیے گئے ہیں۔ذرائع کے مطابق نگراں وزیراعظم پر اختلافات کی وجہ یہ سامنے ہے کہ نواز شریف کسی جج یا بیوروکریٹ کے نام پر اتفاق نہیں چاہتے۔ وزیر اعظم شاہد خاقان عباسی نے نواز شریف کو راضی کرنے کے لیے خورشید شاہ سے مزید وقت مانگا ہے۔

Check Also

مقبوضہ کشمیر میں شہید 11 نوجوانوں کی نماز جنازہ میں ہزاروں افراد کی شرکت

 سری نگر: مقبوضہ کشمیر میں بھارتی فوج کے ہاتھوں 11 بے گناہ نوجوانوں کی شہادت کیخلاف ...

Leave a Reply

Your email address will not be published. Required fields are marked *